स्वित्झर्लंडच्या आल्प्स पर्वतरांगेतील मॅटरहॉर्न हा ४४७८ मीटर उंचीचा पर्वत १८ एप्रिल २०२० रोजी भारतीय तिरंग्याने झळाळून उठला होता. करोना विषाणूमुळे उद्भवलेल्या जागतिक साथीशी लढताना आपण सारे एक आहोत, असा संदेश देण्यासाठी तेथे सुरू असलेल्या उपक्रमाचा एक भाग म्हणून शनिवारी हा पर्वत भारतीय तिरंग्याने उजळवण्यात आला.
आल्प्स पर्वतरांगेतील मॅटरहॉर्न हा ४४७८ उंचीचा पर्वत असून, तो स्वित्झर्लंड आणि इटलीच्या मध्ये झरमॅट या गावात वसलेला आहे. करोनाच्या महाभयंकर साथीशी लढणाऱ्या साऱ्या देशांप्रती सद्भावना व्यक्त करण्यासाठी, एकीची भावना दृढ करण्यासाठी या पर्वतावर एकेका देशाचा झेंडा प्रकाशाद्वारे झळकवण्याचा उपक्रम सुरू करण्यात आला आहे. १८ एप्रिलला भारतीय तिरंग्याचे एक हजार मीटरहून अधिक लांबीचे चित्र प्रकाशाद्वारे या पर्वतावर झळकवण्यात आले. स्वित्झर्लंडमधील लाइट आर्टिस्ट (प्रकाश कलाकार) गेरी हॉफस्टेटर हा उपक्रम राबवत आहेत.
‘जगातील मोठी लोकसंख्या असलेल्या देशांपैकी एक असलेला भारत देश करोना विषाणूशी दोन हात करत आहे. अशा मोठ्या देशांतील आव्हानेही खूप मोठी आहेत. सगळ्या भारतीयांप्रति असलेली आमची सद्भावना आणि एकीची भावना व्यक्त करण्यासाठी मॅटरहॉर्न पर्वतावर तिरंगा झळकवण्यात आला आहे,’ असे झरमॅट मॅटरहॉर्न या पर्यटन संस्थेने आपल्या फेसबुक पोस्टमध्ये म्हटले आहे.
स्वित्झर्लंडमधील भारतीय दूतावासाने या घटनेचे ट्विट केले असून, पंतप्रधान नरेंद्र मोदी यांनी ते रिट्विट केले आहे. ‘जग या महामारीचा सामना एकत्रितपणे करत आहे आणि मानवता या महामारीवर नक्की मात करील,’ असे पंतप्रधानांनी ट्विटमध्ये म्हटले आहे.
करोना विषाणूमुळे जगभर नकारात्मक वातावरण असताना त्यात सकारात्मकतेची आशा जागवण्यासाठी स्वित्झर्लंडकडून मार्चच्या अखेरीपासून हा उपक्रम राबविला जात आहे. मॅटरहॉर्न पर्वत हे लोकप्रिय पर्यटनस्थळ असून, सर्वांत जास्त फोटो टिपले जाणारा पर्वत अशी त्याची ओळख आहे. आतापर्यंत या उपक्रमात अमेरिका, जपान, जर्मनी, ब्रिटन आणि स्पेन या देशांचे झेंडे झळकवण्यात आले आहेत. तीन एप्रिल रोजी या पर्वतावर ‘स्टे होम’ हा संदेश प्रसारित करण्यात आला होता.